Hadithet e ngjashme me hadithin 1535

Muhamed ibn Ebu Bekër Mukademi na ka thënë: Na ka treguar Fudajl ibn Sulejmani se Musa ibn Ukbe tregon: “E kam parë Salim ibn Abdullahun duke synuar disa vende të caktuara përgjatë rrugës (që e kishte përshkuar Pejgamberi ﷺ), pastaj falej aty.

Ai tregonte se babai i tij (Abdullah ibn Omeri) ishte falur në to, sepse e kishte parë Pejgamberin ﷺ duke u falur në po ato vende.

Musa ibn Ukbe ka thënë: “Më ka treguar Nafiu se Ibn Omeri falej nëpër ato vende. E kam pyetur Salimin për të njëjtën gjë dhe fjala e tij përputhej me fjalën e Nafiut për të gjitha vendet, përveç një xhamie në Rrafshinën e Revhasë (vend dy net udhëtim larg Medinës), për të cilën kishin mospajtim mes vete.”

Muhamed ibn Ebu Bekri na ka thënë: Na ka treguar Fudajl ibn Sulejmani, e këtij i ka treguar Musa ibn Ukbe, e këtij i ka treguar Salim ibn Abdullahu se babai i tij Ibn Omeri (Allahu qoftë i kënaqur me të!) tregon se, Pejgamberi ﷺ, teksa ishte në vendin Muarres, që ndodhet në mes të luginës së Dhul Hulejfes ka parë në ëndërr se i është thënë: “Tani ndodhesh në Bat'hanë e bekuar.”

(Musa ibn Ukbe ka thënë): “Salimi ndalej për të pushuar aty ku ndalej Abdullahu, duke synuar vendpushimin (vendin Muarres) e të Dërguarit të Allahut ﷺ, që gjendej poshtë xhamisë, në mes të luginës, diku mes vendpushimit dhe rrugës.”