Hadithet e ngjashme me hadithin 1606

Musededi na ka thënë: Na ka treguar Jahjai, e ky nga Ubejdullahu, e ky nga Nafiu se Ibn Omeri (Allahu qoftë i kënaqur me të!) ka thënë: “Asnjëherë nuk e kam lënë prekjen e këtyre dy këndeve (të Qabesë), as në vështirësi, as në rehati, që kur e kam parë Pejgamberin ﷺ duke i prekur.”

Ubejdullahu thotë: “E kam pyetur Nafiun: “A e praktikonte Ibn Omeri ecjen normale (pa nxitim) mes dy këndeve (jemenase)?” Ai është përgjigjur: “Ecte pa nxitim, që ta kishte më të lehtë prekjen e Gurit të Zi.”

Musededi na ka thënë: Na ka treguar Hamadi se Zubejr ibn Arabiu tregon: “Dikush e pyeti Ibn Omerin (Allahu qoftë i kënaqur me të!) rreth prekjes së Gurit të Zi, e në atë rast i tha:

- E kam parë të Dërguarin e Allahut ﷺ duke e prekur dhe puthur.

- Po nëse ka kallaballëk? Po nëse pengohem (për shkak të turmës)? - e pyeste personi në fjalë.

- Këtë “Po nëse?!” çoje në Jemen! Unë (po të them se) e kam parë të Dërguarin e Allahut ﷺ duke e prekur dhe puthur, - ia ktheu Ibn Omeri.”