Hadithet e ngjashme me hadithin 1654

Aliu na ka treguar se e ka dëgjuar Ebu Bekër ibn Ajashin, e këtij i ka treguar Abdulazizi: E kam takuar Enesin. [t]: Ismail ibn Ebani më ka thënë: Na ka treguar Ebu Bekri se Abdulazizi tregon: “Ditën e tetë (të dhul hixhes) shkova në Mina, ku e takova Enesin (Allahu qoftë i kënaqur me të!), i cili udhëtonte duke qenë hipur mbi gomar.” E pyeta: “Ku e ka falur Pejgamberi ﷺ drekën në këtë ditë (ditën e tetë)?”

- Falu aty ku falen prijësit e tu, - m'u përgjigj.”

Abdullah ibn Muhamedi na ka thënë: Na ka treguar Is'hak Ezraku, e këtij i ka treguar Sufjani se Abdulaziz ibn Rufeji tregon: “E kam pyetur Enes ibn Malikun (Allahu qoftë i kënaqur me të!): “Më trego diçka që e ke mësuar prej Pejgamberit ﷺ: ku e ka falur drekën dhe ikindinë ditën e tetë (të dhul hixhes)?”

- Në Mina, - tha ai.

- Po ikindinë, ku e ka falur ditën e largimit (nga Mina)?

- Në Ebtah, - u përgjigj Enesi, - por ti vepro ashtu siç veprojnë prijësit e tu.”

Muhamed ibn Muthena na ka thënë: Na ka treguar Is'hak ibn Jusufi, e këtij i ka treguar Sufjan Theuriu se Abdulaziz ibn Rufeji tregon: “I thashë Enes ibn Malikut (Allahu qoftë i kënaqur me të!): “Më trego diçka që e ke mësuar prej Pejgamberit ﷺ: ku e ka falur drekën ditën e Tervijes (ditën e tetë të haxhit)?”

- Në Mina, - m'u përgjigj ai.

- Po ditën e largimit (nga Mina), ku e ka falur ikindinë?

- Në Ebtah, por ti vepro ashtu siç veprojnë prijësit e tu.