Hadithet e ngjashme me hadithin 568

Hafs ibn Omeri na ka thënë: Na ka treguar Shuëbe, e ky nga Ebu Minhali se Ebu Berze (Allahu qoftë i kënaqur me të!) tregon se, pasi Pejgamberi ﷺ e falte namazin e sabahut, ne mund ta dallonim atë që kishim afër (sepse ishte zdritur). Në namaz i lexonte gjashtëdhjetë deri njëqind ajete. Drekën e falte kur Dielli kalonte kupën e qiellit. Pasi e falte ikindinë, kishte kohë sa dikush të shkonte deri në fund të Medinës dhe të kthehej sërish, ndërsa Dielli ende rrezatonte fort. Kam harruar çfarë ka thënë për namazin e akshamit. Nuk mërzitej nëse e vononte jacinë deri në fund të së tretës së parë të natës. Më pati thënë: “... deri në mesnatë.”

Muadhi tregon: “Shuëbe ka thënë: “Më vonë e pata takuar dhe më pati thënë: “... ose deri në fund të së tretës së parë të natës.”

Ademi na ka thënë: Na ka treguar Shuëbe se Sejar ibn Selame tregon: “Me babanë tim shkuam tek Ebu Berze Eslemiu (Allahu qoftë i kënaqur me të!) dhe e pyetëm rreth kohëve të namazit.” Ai tha: “Pejgamberi ﷺ drekën e falte kur dielli e kalonte kupën e qiellit. Pasi e falte ikindinë, kishte kohë sa dikush të shkonte deri në fund të Medinës, e dielli vazhdonte të rrezonte fort. Kam harruar çfarë ka thënë për namazin e akshamit. Nuk mërzitej nëse e vononte jacinë deri në (fundin) të tretën e parë të natës. Nuk e pëlqente gjumin para saj dhe bisedat pas saj. Kur e falte namazin e sabahut, ne mund ta dallonim atë që e kishim afër (sepse ishte zdritur). Në një rekat të sabahut, ose në të dy rekatet, i lexonte gjashtëdhjetë deri njëqind ajete.”

Musededi na ka thënë: Na ka treguar Jahjai, e këtij i ka treguar Aufi se Ebu Minhali tregon: “Me babanë tim shkova tek Ebu Berze Eslemiu (Allahu qoftë i kënaqur me të!), të cilit babai i tha: “Na trego si i falte i Dërguari i Allahut ﷺ namazet farze?” Ai tha: “Drekën e falte kur dielli kalonte kupën e qiellit. Pasi e falte ikindinë, kishte kohë sa dikush të kthehej në shtëpinë e tij, në periferi të Medinës, e dielli vazhdonte të rrezonte fort. Harrova çfarë tha rreth namazit të akshamit. Ndërkaq, jacinë i pëlqente ta vononte. E urrente gjumin para saj dhe bisedat pas saj. Namazin e sabahut e kryente atëherë kur zdritej, aq sa mund ta dalloje shokun pranë. Gjatë namazit të sabahut i lexonte gjashtëdhjetë deri njëqind ajete.”

Muhamed ibn Mukatili na ka thënë: Na ka rrëfyer Abdullahu, e këtij i ka rrëfyer Aufi se Sejar ibn Selame tregon: “Me babanë tim shkova tek Ebu Berze Eslemiu (Allahu qoftë i kënaqur me të!), të cilit babai i tha: “Si i falte i Dërguari i Allahut ﷺ namazet farze?” Ai tha: “Drekën e falte kur Dielli e kalonte kupën e qiellit. Pasi e falte ikindinë, kishte kohë sa dikush të kthehej në shtëpinë e tij, në periferi të Medinës, e Dielli vazhdonte të rrezonte fort. Kam harruar çfarë ka thënë rreth namazit të akshamit. Ndërkaq, jacinë i pëlqente ta vononte. E urrente gjumin para saj dhe bisedat pas saj. Namazin e sabahut e mbaronte atëherë kur zdritej, aq sa mund ta dalloje shokun pranë. Gjatë namazit të sabahut i lexonte gjashtëdhjetë deri njëqind ajete.”

Muhamed ibn Selami na ka thënë: Na ka rrëfyer Abdulvehab Thekafiu, e këtij i ka treguar Halid Hadhai, e ky nga Ebu Minhali se Ebu Berze (Allahu qoftë i kënaqur me të!) tregon se i Dërguari i Allahut ﷺ e urrente gjumin para jacisë dhe bisedat pas saj.