Hadithet e ngjashme me hadithin 66

Abdullah ibn Jusufi na ka thënë: Na ka rrëfyer Maliku, e ky nga Is'hak ibn Abdullah ibn Ebu Talhai, se këtij i ka treguar Ebu Murra, i çrobëruari i Akil ibn Ebu Talibit, se Ebu Vakid Lejthiu (Allahu qoftë i kënaqur me të!) tregon: “Një ditë, teksa i Dërguari i Allahut ﷺ ishte në xhami, erdhën tre persona. Dy prej tyre iu bashkëngjitën tubimit të Pejgamberit ﷺ, kurse i treti u largua. Njëri gjeti një hapësirë dhe u ul, kurse tjetri u ul mbrapa turmës, kurse i treti ktheu shpinën dhe u largua. Pasi e kreu, i Dërguari i Allahut ﷺ tha: “A t'ju tregoj për këta tre persona?

I pari u strehua tek Allahu, andaj Allahu e strehoi;

I dyti u turpërua, andaj edhe Allahu u turpërua prej tij (që ta linte pa e shpërblyer); kurse

I treti ktheu shpinën dhe u largua, kësisoj edhe Allahu u largua prej tij.”

Ismaili na ka thënë: Më ka treguar Maliku, e ky nga Is'hak ibn Abdullah ibn Ebu Talhai, e këtij i ka rrëfyer Ebu Murra, i çrobëruari i Akil ibn Ebu Talibit, se Ebu Vakid Lejthiu (Allahu qoftë i kënaqur me të!) tregon se, ndërsa një ditë i Dërguari i Allahut ﷺ ishte ulur në xhami me disa njerëz, erdhën tre persona, dy prej të cilëve iu afruan të Dërguarit të Allahut ﷺ, kurse i treti u largua. Ata dy iu bashkëngjitën tubimit të Dërguarit të Allahut ﷺ: njëri zuri vend në rrethin e formuar nga të pranishmit, e tjetri u ul mbrapa tyre. Ndërkaq, i treti i ktheu shpinën dhe u largua. Kur i Dërguari i Allahut ﷺ mbaroi fjalimin e tij, tha: “A t'ju tregoj për këta tre persona?

I pari u strehua tek Allahu, andaj Allahu e strehoi;

I dyti u turpërua, andaj edhe Allahu u turpërua prej tij (që ta linte pa e shpërblyer); kurse

I treti ktheu shpinën dhe u largua, kësisoj edhe Allahu u largua prej tij.”