Hadithet e ngjashme me hadithin 1395

Muhamedi na ka thënë: Na ka rrëfyer Abdullahu, e këtij i ka rrëfyer Zekerija ibn Is'haku, e ky nga Jahja ibn Abdullah ibn Sajfiu, e ky nga Ebu Mabedi, i çrobëruari i Ibn Abasit, se Ibn Abasi (Allahu qoftë i kënaqur me të!) tregon: “Kur i Dërguari i Allahut ﷺ e dërgoi Muadh ibn Xhebelin në Jemen, i tha: “Ti po shkon te një popull që janë ithtarë të Librit. Kur të arrish tek ata, thirri të dëshmojnë se s'ka të adhuruar të denjë përveç Allahut dhe se Muhamedi është i Dërguari i Allahut. Nëse të binden në këtë, tregoju se Allahu ua ka bërë obligim pesë namaze brenda ditës e natës. Nëse të binden në këtë, tregoju se Allahu ua ka bërë obligim zekatin, që u merret të pasurve e u jepet të varfërve të tyre. E, nëse të binden, kujdes, mos ua merr pasurinë e çmuar! Ruaju lutjes së atij që i bëhet padrejtësi, sepse mes tij dhe Allahut nuk ka perde!”

Umeje ibn Bistami na ka thënë: Na ka treguar Jezid ibn Zureji, e këtij i ka treguar Revh ibn Kasimi, e ky nga Ismail ibn Umeje, e ky nga Jahja ibn Abdullah ibn Sajfiu, e ky nga Ebu Mabedi se Ibn Abasi (Allahu qoftë i kënaqur me të!) tregon se, kur i Dërguari i Allahut ﷺ e dërgoi Muadhin në Jemen, i tha: “Ti po shkon te një popull që janë ithtarë të Librit, gjëja e parë në të cilën i thërret le të jetë adhurimi i Allahut. Kur ta njohin Allahun, tregoju se Allahu ua ka bërë obligim pesë namaze brenda ditës dhe natës. Nëse e falin namazin, tregoju se Allahu ua ka bërë obligim zekatin, që merret nga pasuria e tyre dhe u jepet të varfërve. E, nëse të binden, merrua (zekatin), por mos ua merr pasurinë e çmuar.”

Ebu Asim Dahak ibn Mahledi na ka treguar nga Zekerija ibn Is'haku, e ky nga Jahja ibn Abdullah ibn Sajfiu, e ky nga Ebu Mabedi se Ibn Abasi (Allahu qoftë i kënaqur me të!) tregon se, kur Pejgamberi ﷺ e dërgoi Muadhin në Jemen, i tha: “Bëju thirrje të dëshmojnë se s'ka të adhuruar të denjë përveç Allahut dhe se unë jam i Dërguari i Allahut. Nëse binden në këtë, tregoju se Allahu ua ka bërë obligim pesë namazet brenda një dite e një nate. Nëse binden në këtë, tregoju se Allahu ua ka bërë obligim zekatin në pasurinë e tyre, që u merret të pasurve e u jepet të varfërve të tyre.”