Hadithet e ngjashme me hadithin 1955

Is'hak Vasitiu na ka thënë: Na ka treguar Halidi, e ky nga Shejbaniu se Abdullah ibn Ebu Eufai (Allahu qoftë i kënaqur me të!) tregon: “Me të Dërguarin e Allahut ﷺ ishim në një udhëtim teksa ishte agjërueshëm.” Kur dielli perëndoi, njërit prej nesh i tha: “O filan, ngrihu e na përgatit pak qull (për iftar).”

- O i Dërguari i Allahut, sikur të ngrysej! - ia ktheu ai.

- “Zbrit dhe na përgatit qull”, - i tha prapë.

- O i Dërguari i Allahut, sikur të ngrysej!

- “Zbrit dhe na përgatit qull!”

- Dita ende s'ka mbaruar, - tha sërish ai.

- “Zbrit dhe na përgatit qull!” - ia ktheu Pejgamberi ﷺ.

Atëherë ai zbriti, u përgatiti pak qull dhe Pejgamberi ﷺ piu. Pastaj tha: “Kur ta shihni natën se vjen prej andej, ka ardhur koha që agjëruesi të bëjë iftar.”

Ahmed ibn Junusi na ka thënë: Na ka treguar Ebu Bekri, e ky nga Sulejmani se Ibn Ebu Eufai (Allahu qoftë i kënaqur me të!) tregon: “Me të Dërguarin e Allahut ﷺ isha në një udhëtim, i cili agjëroi derisa u ngrys, e në atë rast i tha njërit: “Zbrit dhe më përgatit pak qull (për iftar).”

- Sikur të prisje derisa të ngryset, - ia ktheu ai.

- “Zbrit dhe më përgatit diçka! Kur ta shohësh natën se vjen prej andej, ka ardhur koha që agjëruesi të bëjë iftar”, - i tha Pejgamberi ﷺ.

Musededi na ka thënë: Na ka treguar Abdulvahidi, e këtij i ka treguar Shejbaniu se Abdullah ibn Ebu Eufai (Allahu qoftë i kënaqur me të!) tregon: “Me të Dërguarin e Allahut ﷺ ishim në udhëtim teksa ishte agjërueshëm.” Kur dielli perëndoi, Pejgamberi ﷺ iu drejtua dikujt: “Zbrit dhe na përgatit pak qull (për iftar).”

- O i Dërguari i Allahut, sikur të ngrysej! - ia ktheu ai.

- “Zbrit dhe na përgatit qull!” - i tha Pejgamberi ﷺ.

- Dita ende s'ka mbaruar, o i Dërguari i Allahut!

- “Zbrit dhe na përgatit qull!”

Atëherë ai zbriti dhe u përgatiti qull. Pastaj Pejgamberi ﷺ tha: “Kur ta shihni natën se vjen prej andej, ka ardhur koha që agjëruesi të bëjë iftar”, - dhe bëri shenjë me gisht në drejtim të lindjes.

Ali ibn Abdullahu na ka thënë: Na ka treguar Sufjani, e ky nga Ebu Is'hak Shejbaniu se Ibn Ebu Eufai (Allahu qoftë i kënaqur me të!) rrëfen: “Me të Dërguarin e Allahut ﷺ ishim në një udhëtim kur njërit prej nesh i tha: “Zbrit dhe më përgatit pak qull (për iftar).”

- Dielli, o i Dërguari i Allahut! - ia ktheu ai.

- “Zbrit dhe më përgatit qull!”

- Dielli, o i Dërguari i Allahut! - i tha prapë.

- “Zbrit dhe më përgatit qull!”

Atëherë ai zbriti, i përgatiti pak qull dhe Pejgamberi ﷺ e piu. Pastaj bëri me dorë matanë dhe tha: “Kur ta shihni natën se vjen prej andej, agjëruesi veçse ka bërë iftar.”

Transmetimin e Sufjanit e fuqizojnë Xheriri dhe Ebu Bekër ibn Ajashi nga Shejbaniu, e ky nga Ibn Ebu Eufai, i cili ka thënë: “Me të Dërguarin e Allahut ﷺ ishim në një udhëtim.”