Hadithet e ngjashme me hadithin 616

Musededi na ka thënë: Na ka treguar Hamadi, e ky nga Ejubi, Abdulhamidi, shoku i Zijadit, dhe Asim Ahveli, se Abdullah ibn Harithi tregon se Ibn Abasi (Allahu qoftë i kënaqur me të!) ligjëroi në një ditë (të premte) me shi (dhe toka ishte bërë lloç). Kur muezini (gjatë ezanit) arriti te fjalët: “Haje alasalah, e urdhëroi (që në vend të këtyre fjalëve) të thërrasë: “Faluni në shtëpitë tuaja!” Njerëzit filluan të shikonin njëri-tjetrin, e ai u tha: “Këtë gjë e ka vepruar ai që ishte më i mirë se unë (Pejgamberi ﷺ), ndërkohë xhumaja është farz.”

Musededi na ka thënë: Na ka treguar Ismaili, e këtij i ka rrëfyer Abdulhamidi, shoku i Zijadit, e këtij i ka treguar Abdullah ibn Harithi, djali i xhaxhait të Muhamed ibn Sirinit, se Ibn Abasi (Allahu qoftë i kënaqur me të!) e porositi muezinin e vet që, në ditët me shi, pas fjalëve: “Eshhedu ene Muhameden Resulullah”, të mos thotë: “Haje alasalah”, por të thotë: “Faluni në shtëpitë tuaja.” Siç duket, njerëzve nuk u pëlqeu kjo, andaj Ibn Abasi u tha: “Këtë gjë e ka vepruar ai që ishte më i mirë se unë (Pejgamberi ﷺ). Xhumaja është farz, por nuk doja t'ju detyroja të dilni nëpër llucë e baltë.”

Abdullah ibn Abdulvehabi na ka thënë: Na ka treguar Hamad ibn Zejdi, e këtij i ka treguar Abdulhamidi, shoku i Zijadit, se Abdullah ibn Harithi tregon: “Një ditë (të premte) me shi, Ibn Abasi (Allahu qoftë i kënaqur me të!) ligjëroi dhe pastaj e urdhëroi muezinin që, në vend të fjalëve: “Haje alasalah (ejani në namaz), të thotë: “Faluni në shtëpitë tuaja! Njerëzit nisën të shikonin njëri-tjetrin, sikur nuk u pëlqente kjo gjë.” Atëherë, Ibn Abasi tha: “Si duket, nuk ju pëlqeu kjo gjë! Këtë e ka vepruar ai që është më i mirë se unë, - aludonte në Pejgamberin ﷺ. Xhumaja është obligim, por nuk desha t'ju ngarkoja.”

Hamadi transmeton nga Asimi, e ky nga Abdullah ibn Harithi, e ky nga Ibn Abasi, ngjashëm, përpos që ky thotë: “Nuk doja t'ju ngarkoja me diçka që mund t'ju bënte të mëkatonit, të vinit në xhami të baltosur deri në gjunjë.”