Hadithet e ngjashme me hadithin 77

Muhamed ibn Jusufi na ka thënë: Na ka treguar Ebu Mus'hiri, e këtij i ka treguar Muhamed ibn Harbi, e këtij i ka treguar Zubejdi, e ky nga Zuhriu se Mahmud ibn Rebiu (Allahu qoftë i kënaqur me të!) tregon: “Mbaj në mend se Pejgamberi ﷺ pati mbushur gojën me ujë prej një kove dhe ma pati hedhur në fytyrë (për ashikëri, shaka ose bekim), ndërsa unë atëkohë kam qenë pesëvjeçar.”

Abdani na ka thënë: Na ka rrëfyer Abdullahu, e këtij i ka rrëfyer Mameri, e ky nga Zuhriu se Mahmud ibn Rabiu (Allahu qoftë i kënaqur me të!) tregon se, qysh i vogël, e mbante në mend të Dërguarin e Allahut ﷺ. I kujtohej kur ai e kishte mbushur gojën me ujë prej një kove dhe ia kishte hedhur në fytyrë (për ashikëri, shaka ose bekim), në shtëpinë e tyre.

Ali ibn Abdullahu na ka thënë: Na ka treguar Jakub ibn Ibrahim ibn Sadi, e këtij i ka treguar babai i vet, e ky nga Salihu, e ky nga Ibn Shihabi se Mahmud ibn Rebiu (Allahu qoftë i kënaqur me të!), personi të cilin i Dërguari i Allahut ﷺ e kishte stërpikur me ujë nga goja sa kishte qenë fëmijë, - Urve transmeton nga Misveri dhe të tjerë pos tij, duke vërtetuar fjalët e njëri-tjetrit - ka thënë: “Kur Pejgamberi ﷺ merrte abdes, njerëzit shtyheshin për ta marrë ujin e mbetur nga abdesi i tij.”