Hadithet e ngjashme me hadithin 1587

Muhamed ibn Abdullah ibn Haushebi na ka thënë: Na ka treguar Abdulvehabi, e këtij i ka treguar Halidi, e ky nga Ikrime se Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Allahu e ka shenjtëruar Mekën, andaj (lufta në të) nuk i është lejuar askujt, as para meje, as pas meje. Mua më është lejuar vetëm për një pjesë të ditës. Në të nuk lejohet as këputja e barit të njomë, as prerja e drunjve, as trembja e gjahut, si dhe marrja e gjërave të gjetura në rrugët e saj, përveç nëse ka për qëllim ta shpallë ndër njerëz.”

Atëherë Abasi tha:

- Përveç idhhirit për argjendarët dhe për varret tona?

- “Përveç idhhirit”, - tha Pejgamberi ﷺ.

Ebu Hurejra transmeton nga Pejgamberi ﷺ, ku ka thënë: “Për varret dhe shtëpitë tona.”

Eban ibn Salihu transmeton nga Hasen ibn Muslimi, e ky nga Safije bint Shejbe se e ka dëgjuar Pejgamberin ﷺ, njëjtë. Muxhahidi e transmeton (këtë hadith) nga Tavusi, e ky nga Ibn Abasi (e ky nga Pejgamberi ﷺ, mirëpo me shprehjen:) “Për farkëtarët dhe shtëpitë e tyre.”

Othman ibn Ebu Shejbe na ka thënë: Na ka treguar Xheriri, e ky nga Mensuri, e ky nga Muxhahidi, e ky nga Tavusi se Ibn Abasi (Allahu qoftë i kënaqur me të!) transmeton se Pejgamberi ﷺ, ditën kur e çliroi Mekën, tha: “Më nuk ka hixhret, por ka xhihad dhe nijet. Kur të ftoheni (nga prijësi i muslimanëve) për luftë, përgjigjjuni. Këtë vend Allahu e ka bërë të shenjtë ditën kur i ka krijuar qiejt dhe Tokën, e ai, me shenjtërinë e Allahut, është i shenjtë deri në Ditën e Kiametit. Andaj, lufta në të nuk i është lejuar askujt, as para meje, as pas meje. Ndërkaq, mua më është lejuar vetëm në një pjesë të ditës. Ai është i shenjtë me shenjtërinë e Allahut deri në Ditën e Kiametit. Nuk lejohet as shkulja e gjembave, as trazimi i gjahut (gjuetia), as merret gjëja e humbur, përveç nëse shpallet ndër njerëz, si dhe nuk priten barishtet e tij.”

- Përveç idhhirit, o i Dërguari i Allahut, se ai përdoret nga farkëtarët dhe për shtëpitë? - pyeti Abasi.

- “Përveç idhhirit”, - tha Pejgamberi ﷺ.

Ali ibn Abdullahu na ka thënë: Na ka treguar Xherir ibn Abdulhamidi, e ky nga Mensuri, e ky nga Muxhahidi, e ky nga Tavusi se Ibn Abasi (Allahu qoftë i kënaqur me të!) transmeton se, Ditën e Çlirimit të Mekës, i Dërguari i Allahut ﷺ ka thënë: “Allahu e ka shenjtëruar këtë qytet (Mekën). Andaj, nuk këputen ferrat në të, as trembet gjahu (gjuetia) e as e merr gjënë e humbur veçse ai që do ta shpallë ndër njerëz.”

Muhamed ibn Muthena na ka thënë: Na ka treguar Abdulvehabi, e këtij i ka treguar Halidi, e ky nga Ikrime se Ibn Abasi (Allahu qoftë i kënaqur me të!) transmeton se Pejgamberi ﷺ ka thënë: “Allahu e ka shenjtëruar Mekën. Andaj, (lufta në të) nuk i është lejuar askujt, as para meje, as pas meje. Ndërkaq, mua më është lejuar vetëm në një pjesë të ditës. Nuk lejohet as shkulja e barishteve, as dëmtimi i pemëve, as trazimi i gjahut, si dhe marrja e gjërave të humbura në rrugët e saj, përveç nëse ka për qëllim ta shpallë ndër njerëz.” Abasi tha:

- Përveç idhhirit, o i Dërguari i Allahut, se na duhet për ndërtim dhe për varret tona?

- “Përveç idhhirit”, - tha Pejgamberi ﷺ.

Halidi tregon se Ikrime ka thënë: “A e di çka do të thotë: “Nuk trazohet gjahu i tij”? Ta trembësh nga hija, në mënyrë që të shkojë atje ku lejohet ta gjuash.”