Hadithet e ngjashme me hadithin 83

Abdullah ibn Jusufi na ka thënë: Na ka rrëfyer Maliku, e ky nga Ibn Shihabi, e ky nga Isa ibn Talhai se Abdullah ibn Amri (Allahu qoftë i kënaqur me të!) tregon se, në Haxhin Lamtumirës, i Dërguari i Allahut ﷺ u ndal, në mënyrë që ta pyesnin njerëzit. Një burrë i tha:

- Pa u menduar, i kam rruar flokët para se të ther kurban.

- “There se s'ka gjë”, - iu përgjigj Pejgamberi ﷺ.

- Pa u menduar, e kam therur kurbanin para se t'i gjuaj guralecët, - i tha një tjetër.

- “Gjuaji se s'ka gjë.”

Atë ditë, sa herë që Pejgamberi ﷺ pyetej për ndonjë veprim të bërë para ose pas radhës së vet, përgjigjej: “Bëje, se s'ka gjë.”

Ismaili na ka thënë: Më ka treguar Maliku, e ky nga Ibn Shihabi, e ky nga Isa ibn Talha ibn Ubejdullahu se Abdullah ibn Amër ibn Asi (Allahu qoftë i kënaqur me të!) transmeton se, në haxhin lamtumirës, i Dërguari i Allahut ﷺ u ndal në Mina, që njerëzit ta pyesnin (për ritualet e haxhit). Kështu, një burrë erdhi dhe i tha: “I kam rruar flokët pa dijeni, para se të ther kurbanin.”

- “There se s'ka gjë”, - tha Pejgamberi ﷺ.

Një tjetër i tha: “E kam therur kurbanin pa dijeni, para se t'i hedh gurët.”

- “Gjuaji se s'ka gjë”, - ia ktheu Pejgamberi ﷺ.

Sa herë që atë ditë pyetej Pejgamberi ﷺ për ndonjë rit të bërë para ose pas radhës së vet, gjithnjë përgjigjej: “Bëje se s'ka gjë.”

Seid ibn Jahja ibn Seidi na ka thënë: Na ka treguar babai im, e këtij i ka treguar Ibn Xhurejxhi, e këtij i ka treguar Zuhriu, e ky nga Isa ibn Talhai se Abdullah ibn Amër ibn Asi (Allahu qoftë i kënaqur me të!) tregon se ishte pjesëmarrës kur Pejgamberi ﷺ ligjëronte ditën e Bajramit të Kurbanit. Kështu, një burrë u ngrit dhe tha: “Kam menduar se filan vepra bëhet para filan veprës.” Pastaj u ngrit edhe një tjetër e tha: “Kam menduar se filan vepra bëhet para filan veprës.”

- I kam rruar flokët para se të ther kurban.

- Kam therur kurban para se t'i gjuaj guralecët.

Pyetje të këtilla.

Pejgamberi ﷺ, të gjitha këtyre, u përgjigjej: “Bëje, se s'ka gjë.”

Atë ditë, për çfarëdo që pyetej, thoshte: “Bëje, se s'ka gjë.”

Ebu Nuajmi na ka thënë: Na ka treguar Abdulaziz ibn Ebu Seleme, e ky nga Zuhriu, e ky nga Isa ibn Talhai se Abdullah ibn Amër ibn Asi (Allahu qoftë i kënaqur me ta!) ka thënë: “E pashë Pejgamberin ﷺ te xhemra (në Mina), teksa njerëzit po i bënin pyetje, ndërkohë një burrë i tha: “O i Dërguari i Allahut! E kam therur kurbanin pa dijeni, para se t'i hedh gurët.”
Ai i tha: “Gjuaji se s'ka gjë.”
Një tjetër i tha: “O i Dërguari i Allahut! I kam rruar flokët pa dijeni, para se ta ther kurbanin.”
Pejgamberi ﷺ i tha: “There se s'ka gjë.”
Dhe, Pejgamberi ﷺ nuk është pyetur për diçka që është bërë para ose pas radhës së vet, e të mos jetë përgjigjur me: “Bëje se s'ka gjë.”

Is'haku na ka thënë: Na ka rrëfyer Jakub ibn Ibrahimi, e këtij i ka treguar babai i tij, e ky nga Ebu Salihu, e ky nga Ibn Shihabi, e këtij i ka treguar Isa ibn Talha ibn Ubejdullahu se Abdullah ibn Amër ibn Asi (Allahu qoftë i kënaqur me të!) ka thënë se i Dërguari i Allahut ﷺ qëndronte mbi devenë e tij...

Ka përmendur hadithin (e pyetjeve në ditën e Bajramit). Transmetimin e Salihut e ka fuqizuar Mameri nga Zuhriu.