Hadithet e ngjashme me hadithin 84

Muhamed ibn Abdullah ibn Haushebi na ka thënë: Na ka treguar Hushejmi, e këtij i ka rrëfyer Mensuri, e ky nga Atai se Ibn Abasi (Allahu qoftë i kënaqur me të!) tregon: “Pejgamberin ﷺ e pyetën për atë që e rruan kokën para se të therë, si dhe pyetje të tjera të këtilla, e në atë rast u thoshte: “S'ka gjë. S'ka gjë.”

Musa ibn Ismaili na ka thënë: Na ka treguar Vuhejbi, e këtij i ka treguar Ibn Tavusi, e ky nga babai i tij se Ibn Abasi (Allahu qoftë i kënaqur me të!) tregon se e pyetën Pejgamberin ﷺ rreth therjes së kurbanit, rruajtjes së flokëve, gjuajtjes së guralecëve, si dhe dhënies përparësi ose vonimit të ndonjë prej këtyre veprimeve, e në atë rast u përgjigj: “S'ka gjë.”

Musa ibn Ismaili na ka thënë: Na ka treguar Vuhejbi, e këtij i ka treguar Ejubi, e ky nga Ikrime se Ibn Abasi (Allahu qoftë i kënaqur me të!) transmeton se, gjatë haxhit, dikush i tha Pejgamberit ﷺ: “E kam therur kurbanin para se t'i gjuaj guralecët.” Ai bëri me dorë duke thënë: “S'ka gjë.” Pastaj iu tha: “I kam rruar flokët para se ta ther kurbanin.” Ai përsëri bëri me dorë duke thënë: “S'ka gjë.”

Muhamed ibn Muthena na ka thënë: Na ka treguar Abdulalai, e këtij i ka treguar Halidi, e ky nga Ikrime se Ibn Abasi (Allahu qoftë i kënaqur me të!) tregon se dikush e pyeti Pejgamberin ﷺ:

- I kam gjuajtur guralecët pasdite.

- “S'ka gjë”, - tha Pejgamberi ﷺ.

- Unë e kam rruar kokën para se ta ther kurbanin, - i tha një tjetër.

- “S'ka gjë.”

Ali ibn Abdullahu na ka thënë: Na ka treguar Jezid ibn Zuraji, e këtij i ka treguar Halidi, e ky nga Ikrime se Ibn Abasi (Allahu qoftë i kënaqur me të!) tregon se njerëzit e pyetnin Pejgamberin ﷺ, ditën e Bajramit të Kurbanit në Mina, e ai u përgjigjej: “S'ka gjë.” Një person pyeti:

- I kam rruar flokët para se të ther kurban?

- “There se s'ka gjë.”

- I kam gjuajtur guralecët pasdite, - i tha një tjetër.

- “S'ka gjë”, - iu përgjigj Pejgamberi ﷺ.