Hadithet e ngjashme me hadithin 1229

Abdullah ibn Mesleme na ka treguar nga Malik ibn Enesi, e ky nga Ejub ibn Ebu Temime Sehtijani, e ky nga Muhamed ibn Sirini se Ebu Hurejra (Allahu qoftë i kënaqur me të!) tregon se një ditë i Dërguari i Allahut ﷺ dha selam në rekatin e dytë, e në atë rast Dhuljedejni i tha:

- O i Dërguari i Allahut, a u shkurtua namazi apo harrove?

- “A po e thotë të vërtetën Dhuljedejni?” - pyeti i Dërguari i Allahut ﷺ.

- Po, - iu përgjigjën njerëzit.

Atëherë i Dërguari i Allahut ﷺ u ngrit, i fali edhe dy rekate, dha selam, mori tekbirin dhe ra në sexhde sikurse për sexhdet e namazit, ose edhe më gjatë.

Hafs ibn Omeri na ka thënë: Na ka treguar Jezid ibn Ibrahimi, e ky nga Muhamedi se Ebu Hurejra (Allahu qoftë i kënaqur me të!) tregon: “Teksa Pejgamberi ﷺ po na falte njërin prej namazeve të pasdites, - Muhamedi (transmetuesi) thotë: “Ka të ngjarë të ketë qenë ikindia, - i fali dy rekate dhe dha selam. U ngrit dhe shkoi në pjesën e parme të xhamisë, te një cung, ku vendosi dorën e tij (dhe u mbështet).

Në mesin e të pranishmëve ishin edhe Ebu Bekri me Omerin, mirëpo druajtën ta pyesin (rreth asaj që ndodhi) nga respekti që kishin për të.

Ata që nguteshin, duke dalë (nga xhamia) thoshin: “Vallë, është shkurtuar namazi?”

Mirëpo, një burrë, të cilin Pejgamberi ﷺ e quante Dhuljedejn (Duargjati), pyeti:

- A harrove apo u shkurtua namazi?

- “As kam harruar, as është shkurtuar namazi”, - tha Pejgamberi ﷺ.

- Po, vërtet harrove, - ia ktheu ai.

Atëherë Pejgamberi ﷺ i fali dy rekate, dha selam, bëri tekbirin dhe ra në sexhde, sikurse në sexhden e namazit, ose më gjatë, e ngriti kokën duke bërë tekbirin, pastaj sërish ra në sexhde dhe u ngrit prej saj me tekbir.”

Is'haku na ka thënë: Na ka treguar Ibn Shumejli, e këtij i ka rrëfyer Ibn Avniu, e ky nga Ibn Sirini se Ebu Hurejra (Allahu qoftë i kënaqur me të!) tregon: “Teksa i Dërguari i Allahut ﷺ po na falte njërin prej namazeve të ditës, - Ibn Sirini thotë se Ebu Hurejra përmendi njërin prej tyre, mirëpo e kam harruar, - i fali dy rekate e dha selam. U ngrit dhe, disi i zemëruar, shkoi te një cung i shtrirë brenda xhamisë dhe u mbështet në të. E vendosi dorën e djathtë mbi të majtën dhe i gërshetoi gishtërinjtë, ndërsa faqen e djathtë e vendosi në shpinën e dorës së majtë. Ata që nguteshin, dolën prej xhamisë dhe thanë: “Mos është shkurtuar namazi?”

Në mesin e tyre ishte Ebu Bekri dhe Omeri, porse nuk morën guximin ta pyesnin Pejgamberin ﷺ. Mirëpo, një burrë nga turma, që i kishte duart e gjata dhe e quanin Dhuljedejn (Duargjati), tha:

- O i Dërguari i Allahut! A harrove apo u shkurtua namazi?

- “As kam harruar, as është shkurtuar namazi, - tha Pejgamberi ﷺ e vijoi: - A është ashtu siç po thotë Dhuljedejni?” - duke iu drejtuar të tjerëve.

- Po, - i thanë.

Pejgamberi ﷺ u drejtua dhe e fali pjesën që kishte harruar, dha selam, mori tekbirin dhe ra në sexhde, sikurse për sexhden gjatë namazit ose më gjatë, e ngriti kokën duke marrë tekbirin, pastaj sërish ra në sexhde sikurse për sexhden gjatë namazit ose më gjatë dhe u ngrit prej saj me tekbir.

Ibn Sirinin e pyetën: “A ka dhënë selam në fund (pas sexhdeve të harresës)?”

U tha: “Më ka treguar dikush se Imran ibn Husajni ka thënë: “Pastaj ka dhënë selam (në fund).”

Ademi na ka thënë: Na ka treguar Shuëbe, e ky nga Sad ibn Ibrahimi, e ky nga Ebu Seleme se Ebu Hurejra (Allahu qoftë i kënaqur me të!) tregon: “Pejgamberi ﷺ na e fali drekën ose ikindinë dhe dha selam.” Dhuljedejni i tha: “O i Dërguari i Allahut, mos u shkurtua namazi?”

- “A është e vërtetë kjo që ky po thotë (se i kam falur vetëm dy rekate)?” - i pyeti të pranishmit Pejgamberi ﷺ.

- Po, - i thanë.

Pastaj i fali edhe dy rekate të tjera dhe bëri dy sexhde.

Sad ibn Ibrahimi tregon: “E kam parë Urve ibn Zubejrin duke dhënë selam pas dy rekateve të akshamit (nga harresa), foli diçka, pastaj e fali pjesën e mbetur dhe i bëri dy sexhde.” Pas kësaj tha: “Kështu ka vepruar Pejgamberi ﷺ.”

Abdullah ibn Jusufi na ka thënë: Na ka rrëfyer Malik ibn Enesi, e ky nga Ejub ibn Ebu Temime Sehtijaniu, e ky nga Muhamed ibn Sirini se Ebu Hurejra (Allahu qoftë i kënaqur me të!) tregon se një ditë, i Dërguari i Allahut ﷺ dha selam në rekatin e dytë, e në atë rast Dhuljedejni i tha:

- O i Dërguari i Allahut, a u shkurtua namazi apo harrove?

- “A po e thotë të vërtetën Dhuljedejni?” - pyeti Pejgamberi ﷺ.

- Po, - iu përgjigjën njerëzit.

Atëherë, i Dërguari i Allahut ﷺ u ngrit, i fali edhe dy rekate, dha selam, bëri tekbirin dhe ra në sexhde sikurse për sexhdet e namazit, ose edhe më gjatë, pastaj ngriti (kokën).

Sulejman ibn Harbi na ka thënë: “Na ka treguar Hamadi se Seleme ibn Alkame tregon: “E pyeta Muhamed ibn Sirinin: “A bëhet teshehud pas sexhdes së harresës?” Ai më tha: “Në hadithin e Ebu Hurejrës nuk përmendet (një gjë e tillë).”

Ebu Velidi na ka thënë: Na ka treguar Shuëbe, e ky nga Sad ibn Ibrahimi, e ky nga Ebu Seleme se Ebu Hurejra (Allahu qoftë i kënaqur me të!) tregon se njëherë Pejgamberi ﷺ e fali drekën dy rekate. Dikush i tha: “I fale dy rekate.” Pastaj i shtoi edhe dy rekate të tjera dhe, në fund, i bëri dy sexhde.