Hadithet e ngjashme me hadithin 956

Seid ibn Ebu Merjemi na ka thënë: Na ka treguar Muhamed ibn Xhaferi, e këtij i ka rrëfyer Zejdi, e ky nga Ijad ibn Abdullah ibn Ebu Serhu se Ebu Seid Hudriu (Allahu qoftë i kënaqur me të!) tregon: “Në ditën e Bajramit të Fitrit dhe Kurbanit i Dërguari i Allahut ﷺ dilte në namazgjah dhe gjëja e parë që bënte ishte namazi. Pastaj, ngrihej në drejtim të njerëzve, të cilët qëndronin ulur nëpër safa dhe i këshillonte, i porosiste dhe i urdhëronte. Po të donte të ndante ndonjë grup për ta dërguar në ndonjë mision ushtarak, e ndante, e, po të donte t'i urdhëronte për diçka, i urdhëronte. Më pas, e përfundonte ligjërimin.

Kështu vazhdoi praktika e ligjërimit derisa një ditë, për Bajramin e Kurbanit ose Fitrit, dola me Mervanin, që atëkohë ishte prijës i Medinës dhe, kur arritëm në namazgjah, pashë një minber që e kishte ndërtuar Kethir ibn Salti. Mervani mori të ngjitej në minber para namazit, andaj e kapa për rrobe, por ai e tërhoqi rrobën dhe u ngjit dhe e mbajti hutben para namazit. I thashë:

- Betohem në Allahun se i paskeni ndryshuar gjërat.

- O Ebu Seid, gjërat nuk janë ashtu siç i mbajtke ti në mend, - më tha Mervani.

- Betohem në Allahun se ajo që di unë është më e mirë sesa ajo që nuk di, - i thashë.

- Njerëzit nuk prisnin të na dëgjonin pas namazit, andaj u desh që ta zhvendosnim (hutben) para namazit, - tha Mervani.”

Seid ibn Ebu Merjemi na ka thënë: Na ka rrëfyer Muhamed ibn Xhaferi, e këtij i ka rrëfyer Zejd ibn Eslemi, e ky nga Ijad ibn Abdullahu se Ebu Seid Hudriu (Allahu qoftë i kënaqur me të!) ka thënë: “I Dërguari i Allahut ﷺ doli në namazgjah për Bajramin e Kurbanit, - ose ka thënë: Fitrit, - dhe kaloi pranë grave e u tha: “O ju gra! Jepni lëmoshë, sepse (natën që jam ngritur në qiell) kam parë që ju jeni banoret më të shumta të Zjarrit.”

Ato e pyetën: “Përse, o i Dërguari i Allahut?”

Pejgamberi ﷺ u tha: “Mallkoni shpesh dhe e përbuzni mirësinë (e bashkëshortit ose të dikujt të tillë). Nuk kam parë të mangëta në mendje dhe fe e që ia turbullojnë mendjen burrit të matur më shumë se ju (gratë).”

- E çfarë mangësie ka në fenë dhe mendjen tonë, o i Dërguari i Allahut? - pyetën ato.

- “A nuk konsiderohet dëshmia e gruas sa gjysma e dëshmisë së burrit?” - i pyeti Pejgamberi ﷺ.

- Po, ashtu është, - thanë ato.

- “Kjo konsiderohet mangësi në mendje. Po ashtu, kur i vijnë menstruacionet, a nuk e lë namazin dhe agjërimin?”

- Po, ashtu është, - thanë gratë.

- “Kjo konsiderohet mangësi në fe”, - u tha Pejgamberi ﷺ.”

Ibn Ebu Merjemi na ka thënë: Na ka rrëfyer Muhamed ibn Xhaferi, e këtij i ka rrëfyer Zejdi, e ky nga Ijad ibn Abdullahu se Ebu Seid Hudriu (Allahu qoftë i kënaqur me të!) tregon: “I Dërguari i Allahut ﷺ doli në namazgjah për namazin e Bajramit të Kurbanit ose Fitrit dhe, pasi u fal, u kthye, i këshilloi njerëzit dhe i urdhëroi për lëmoshë, duke thënë: “O njerëz, jepni lëmoshë!” Pastaj kaloi pranë grave e u tha: “O ju gra! Jepni lëmoshë, sepse (natën që jam ngritur në qiell) kam parë se ju jeni banoret më të shumta të Zjarrit.”

Ato e pyetën: “Për çfarë arsye, o i Dërguari i Allahut?”

Pejgamberi ﷺ u tha: “Mallkoni shpesh dhe e përbuzni mirësinë (e bashkëshortit ose të dikujt të tillë). Nuk kam parë të mangëta në mendje dhe fe e që ia turbullojnë mendjen burrit të matur më shumë se ju, o gra.” Pastaj shkoi. Kur arriti në shtëpinë e tij, vajti Zejnebja, gruaja e Ibn Mesudit, e cila kërkoi leje për të hyrë. I thanë:

- O i Dërguari i Allahut, Zejnebja.

- “Cila Zejnebe?” - pyeti ai.

- Gruaja e Ibn Mesudit, - i thanë.

- “Po, lejojeni!” - tha ai.

E lejuan (që të hyjë).

- O i Dërguari i Allahut, sot urdhërove për lëmoshë, e unë kam një stoli timen që dëshiroj ta jap lëmoshë. Mirëpo, Ibn Mesudi po pretendon se ai dhe fëmijët e tij janë më meritorët për lëmoshën time.

- “Ibn Mesudi e ka thënë të vërtetën. Burri dhe fëmijët e tu janë më meritorët për lëmoshën tënde”, - iu përgjigj Pejgamberi ﷺ.

Ibn Ebu Merjemi na ka thënë: Na ka treguar Muhamed ibn Xhaferi, e këtij i ka treguar Zejdi, e ky nga Ijadi se Ebu Seidi (Allahu qoftë i kënaqur me të!) transmeton se Pejgamberi ﷺ ka thënë: “Kur (femrës) i vijnë menstruacionet, a nuk e lë namazin dhe agjërimin? Kjo konsiderohet mangësi në fenë e saj.”