Hadithet e ngjashme me hadithin 87

Muhamed ibn Beshari na ka thënë: Na ka treguar Gunderi, e këtij i ka treguar Shuëbe se Ebu Hamzai thotë: “Teksa po përcillja fjalët e Ibn Abasit atyre që ishin mbrapa meje, ai tha: “Delegacioni i Abdulkajsit erdhi te Pejgamberi ﷺ, e ai u tha: “Cilët jeni ju, o delegacion?” - ose ka thënë: “Cilët jeni ju, o njerëz?” - I thanë: “Jemi nga fisi rebia.” Pejgamberi ﷺ tha: “Mirë se erdhët, o njerëz!” Ose u tha: “O delegatë! Nuk do të jeni as të poshtëruar, as pishmanë (që keni ardhur tek unë).”

I thanë: “Ne vijmë prej një toke të largët, e mes nesh dhe jush gjendet vendbanimi i jobesimtarëve të mudarit, dhe nuk po mund të vijmë, përveçse në muajt e shenjtë. Andaj, na urdhëro diçka konkrete, që t'i njoftojmë edhe të tjerët që kemi lënë mbrapa, e me të ta fitojmë Xhenetin. Atëherë, Pejgamberi ﷺ ua urdhëroi katër gjëra dhe ua ndaloi katër të tjera, duke filluar me urdhërimin për ta besuar Allahun, Një dhe të Vetëm.”

Pastaj, u tha: “A e dini ç'është besimi në Allahun, Një dhe të Vetëm?” Ata iu përgjigjën: “Allahu dhe i Dërguari i Tij e dinë më së miri.” Ai i tha: “Dëshmia se s'ka të adhuruar të denjë përveç Allahut dhe se Muhamedi ﷺ është i Dërguari i Allahut, falja e namazit, dhënia e zekatit, agjërimi i Ramazanit dhe dhënia e një të pestës nga preja e luftës.” Pastaj, ua ndaloi: enën prej kungulli, shtambën, vorbën e lyer me katran.

Shuëbe ka thënë: “(Ebu Xhemra) ndoshta e ka përmendur edhe: “fuqinë e drunjtë” ose “koritën e lyer me katran.” Në fund, u tha: “Mësojini mirë këto gjëra dhe njoftoni edhe të tjerët që keni lënë mprapa jush.”

Ali ibn Xhadi na ka thënë: Na ka rrëfyer Shuëbe se Ebu Xhemra ka thënë: “Qëndroja tek Ibn Abasi (Allahu qoftë i kënaqur me të!), i cili më ulte në vendin e tij. Një ditë prej ditësh më tha: “Qëndro tek unë të të jap një pjesë të pasurisë sime, kështu që ndenja tek ai dy muaj. Një ditë më tha: “Kur delegacioni i Abdulkajsit vajti te Pejgamberi ﷺ, ky u tha: “Cilët jeni ju, o njerëz, - ose ka thënë: Cilët jeni ju, o delegatë?” -
- Jemi nga fisi rebia, - i thanë ata.
- “Mirë se erdhët, o njerëz, - ose ka thënë: o delegatë! - Nuk do të jeni as të poshtëruar, as pishmanë (që keni ardhur tek unë)”, - u tha ai.
- O i Dërguari i Allahut, ne nuk po mund të vijmë te ti, përveçse në këtë muaj të shenjtë, e mes nesh e jush ndodhet vendbanimi i jobesimtarëve të mudarit, andaj na urdhëro diçka konkrete, që t'i njoftojmë edhe ata që i kemi lënë mbrapa, në mënyrë që ta fitojmë Xhenetin, - thanë ata, si dhe e pyetën rreth pijeve.
Atëherë, Pejgamberi ﷺ ua urdhëroi katër gjëra dhe ua ndaloi katër të tjera: i urdhëroi ta besonin Allahun, që është Një dhe i Vetëm, e në atë rast i pyeti: “A dini ç'është besimi në Allahun, që është Një dhe i Vetëm?”
- Allahu dhe i Dërguari i Tij e dinë më së miri, - iu përgjigjën ata.
- “Dëshmia se s'ka të adhuruar të denjë përveç Allahut, falja e namazit, dhënia e zekatit, agjërimi i Ramazanit dhe dhënia e një të pestës nga preja e luftës”, - u tha ai.
Po ashtu, ua ndaloi katër gjëra: shtambën, enën prej kungulli, varelën dhe vorbën e katranosur, - ose ka përmendur edhe koritën. Në fund u tha: “Mësoni mirë këto gjëra dhe njoftoni edhe të tjerët mbrapa jush.”

Kutejbe ibn Seidi na ka thënë: Na ka treguar Abad ibn Abadi, e ky nga Ebu Xhemra se Ibn Abasi (Allahu qoftë i kënaqur me të!) tregon: “Delegacioni i Abdulkajsit erdhi tek i Dërguari i Allahut ﷺ dhe i tha: “Ne jemi pjesëtarë të fisit rebia dhe nuk po mund të vijmë te ti, përveçse në muajt e shenjtë. Andaj, na urdhëro diçka konkrete, të mësojmë nga ti dhe t'i njoftojmë të tjerët. Pejgamberi ﷺ u tha: “Jua urdhëroj katër gjëra dhe jua ndaloj katër të tjera:

1. Besimin në Allahun (që është): të deklaruarit se s'ka të adhuruar të denjë përveç Allahut dhe se unë jam i Dërguari i Allahut;

2. Faljen e namazit,

3. Dhënien e zekatit dhe

4. Të ma jepni një të pestën e presë së luftës.

Jua ndaloj përdorimin e enës prej kungullit, shtambës, koritës dhe varelës (për fermentimin e mushtit).”

Haxhaxhi na ka thënë: Na ka treguar Hamad ibn Zejdi, e këtij i ka treguar Ebu Xhemra se Ibn Abasi (Allahu qoftë i kënaqur me të!) tregon: “Delegacioni i fisit abdulkajs erdhën te Pejgamberi ﷺ dhe i thanë: “O i Dërguari i Allahut! Ne jemi pjesëtarë të fisit rebia, por mes jush dhe nesh gjenden jobesimtarët e mudarit, andaj nuk po mund të vijmë te ti, përveçse në muajt e shenjtë. Na urdhëro diçka konkrete, që ta mësojmë prej teje e t'i njoftojmë të tjerët.” Pejgamberi ﷺ u tha: “Jua urdhëroj katër gjëra dhe jua ndaloj katër të tjera:

1. Besimin në Allahun (që është): të deklaruarit se s'ka të adhuruar të denjë përveç Allahut, - Pejgamberi ﷺ lëvizi dorën për të numëruar,

2. Faljen e namazit,

3. Dhënien e zekatit dhe

4. Të jepni një të pestën e presë së luftës.

Jua ndaloj përdorimin e enës nga kungulli, shtambës, varelës dhe vorbës së katranosur.”

Sulejmani dhe Ebu Numani, duke transmetuar nga Hamadi, kanë thënë: “Besimi në Allahun: “të deklaruarit se s'ka të adhuruar të denjë përveç Allahut.”